5 خطوات PR عشان تقنع صاحبك الفيجن ياكل لحمة

In منوعات

وصل عيد اللحمة ووسطنا ناس مبياكلوش لحمة، تخيل تكون عازم صاحبك وعامله كل ما لذ وطاب عشان يقولك إنه قرر يكون فيجن، ومبياكلش لحوم أو مشتقات ألبان !!

قبل ما تتهور عليه، الـPR هيديك شوية خطوات استراتيجية تقدر بيهم تتحكم في الكارثة..

1- هدي نفسك:

لازم تدير الأزمة، أول وأهم حاجة لازم تهدى عشان تكون انت المسيطر.. الخطوات الجاية محتاجة مخ رايق.

إدارة الأزمات أو الـCrisis management ليها طرق كتير، تقليدية وغير تقليدية، أنصحك تبعد عن طريقة تدمير الأزمة ذاتيًا وتفجيرها من الداخل، يعني بلاش تكون هجومي وتطلَّع من عينك نار وتقوله الاكل مش هيترمي وهيتاكل.. انت مش ماما، واحنا في عيد بلاش نقلبها خناقة، اعتقد إن طريقة احتواء وتحويل مسار الأزمة هيكون أفيد في حالتنا، ببساطة ارضخ لرأيه.. مؤقتًا.

2- احسب الخساير:

اعمل Monitoring أو رصد لمدى تطور الوضع، خد بالك من رد فعله أدام ريحة الرقاق والفتة.. خش على فيسبوك وشوف منافسينه في قوة الصمود أمام اللحمة حالهم ايه، يعني خد فكرة منظمة عن الوضع كله.

3- عد الجثث:

احتوينا الوضع وعملنا رصد لحالته وحالة المنافسين، دلوقتي هتكلمه عن فلان الفيجن اللي منزل صورته باللحمة، أو عن ان اللحمة في الواقع مفيدة وإن الحيوان بالفعل اتدبح ولو متاكلش هيبقى موته راح على الفاضي، وتوصي مراتك وعيالك انهم يتكلموا عن أد ايه اللحمة دي طعمها حلو، وتبقى كده بتستخدم اسوب القص أو الحكي.

4- الخطة البديلة:

بعد ما تستخدم اسلوب القص والكلام عن حلاوة اللحمة وعظمة نفّس مراتك، شاورلها تنزل بالأكل وخلّي ريحة وشكل الأكل تاخد منك الميكروفون وتكمل.

ولو لسه مصمم على موقفه يبقى متتوترش، انزل بأخر سلاح.. طبق السلطة، قوله أنا احترمت قرارك انت فعلا صح، وحطله طبق السلطة ادامه وسط كل أكلكوا غير النباتي، وسيبه لضميره.

المواجهة الأخير:

وفيها هنقوم بطريقة تفريغ الأزمة من مضمونها، بمعنى إنك هتقوله إن النبات كمان بيحس، ليه بتفرق بين الكائنات الحية؟

اضربه في معتقداته، وخليه يتشوش، مع ريحة التوم في الفتة.. غالبًا هيرفع الراية البيضا ويقول انا ممكن اجرب النهارده بس.

أما لو صاحبك بعد كل ده لسه مصمم على موقفه، وقرر بنفس راضية انه ياكل طبق السلطة وميقربش للحمة يبقى سيبه.. النباتيين بشر زيّنا عادي بس ليهم اسبابهم اللي بتمنعهم عن أكل اللحوم أو مشتقات الألبان، وسواء كان صاحبك فيجن “vegan” يعني أسلوب حياته بيستثنى اللحوم وكل الأطعمة المستخرجة من الحيوان زي البيض والجبنة وحتى اللبس المصنوع من جلودها أو فروها، أو فيجيتريان “vegetarian” بمعنى إنه بيستثنى أكل لحوم الحيوانات من أكله بس مبيمانعش ياكل الأطعمة المستخرجة منها، فانت لازم تحترم رأيه لإن صاحبك صاحب موقف، سواء اتفقت أو اختلفت معاك متقدرش إلا انك تحترمه.

واستخدم نفس التقنيات معاه في حاجة تانية، زي عروسة طنط ميمي اللي رافض يقابلها مع انها حلوة، الـPR اسلوب حياة واستراتيجياته هتنفعك في كل حاجة.

عيد لحمة سعيد..

يمكنك أيضا قراءة هذه المواضيع!

ملكة جمال فرنسا والكون تتجول في سيارة بشوارع مصر كُتب عليها عبارة “41 سنة”

قامت شركة بيجو احتفلا بمرور ٤١ سنة علي تواجدها بمصر باستضافة الفرنسية إيريس ميتينير، ملكة جمال فرنسا والكون والتي

أكمل القراءة …

يتم اليوم افتتاح فعاليات المؤتمر الاقتصادى العاشر والمعرض السنوى “الناس والبنوك”

تحت رعاية طارق عامر، محافظ البنك المركزى المصرى، يتم اليوم افتتاح فعاليات المؤتمر الاقتصادى العاشر والمعرض السنوى “الناس والبنوك”

أكمل القراءة …
الشركات و منتخب مصر

استخدام الشركات المختلفة للحظة التاريخية التي قادت مصر لكأس العالم 2018

قامت عديد من الشركات علي مواقع التواصل الاجتماعي بمشاركتهم فرحة المصريين بالفوز و كان اهمها قيام الهضبة عمر دياب

أكمل القراءة …

أضف تعليق:

بريدك الإلكتروني لن يتم نشره

قائمة الموبايل