يعني إيه Online- PR؟

In بالعربيPR
عني إيه Online- PR؟

بقالك أد ايه فاكر إن العلاقات العامة مهمتها توصّل وتستقبل الناس وتعرفهم على بعض؟

أحب أصدمك إن العلاقات العامة أو المهنة الغامضة في المسلسلات العربي القديمة ملهاش علاقة بجمع راسين في الحلال وتعريف الناس ببعض، ولا هي المسؤولة عن صرف المرتبات في الشركة، ولا مجرد استغلال للأوضة الفاضية في المؤسسة وتجميع ناس شيك لابسين بدل فيها من باب إن الأوضة الفاضية بتلم شياطين، اتضحك علينا يا عزيزي والعلاقات العامة طلعت أهم من كده !

مبدئياً العلاقات العامة نوعين، تقليدية “Offline” وإلكترونية “Online“، وهنفسر النوعين والفرق بينهم بالظبط في مقال مخصوص، بس دلوقتي هنتكلم عن العلاقات العامة الالكترونية أو  Online- PR عشان نعرف إيه هي؟

الأونلاين PR هو استخدام وسائل الإعلام المختلفة على الإنترنت لصنع ومشاركة محتوى عن “براند” أو مؤسسة أو حتى شخص، والوصول للجمهور المستهدف والتواصل معاه عن طريق الإعلام الإلكتروني.

يعني ببساطة هو بناء وإدارة سمعتك، وبما إن “المشهور” الشاطر هو اللي بيشارك جمهوره نفس الأفكار، فتشكيل الصورة الصح ليك في عقل الناس يعتبر أمر مهم لتوصيل ماركتك لهوية متميزة ورائدة، ودي مهمة العلاقات العامة الإلكترونية.

الحقوقي مالكوم إكس بيقول “الإعلام هو أكبر قوة على الأرض، لأن لهم القدرة على أن يجعلوا البريء مجرم والمجرم بريء، وهذه هي القوة.” والعلاقات العامة الإلكترونية بتشمل استهداف وسائل الإعلام المؤثرة، والتأثير على المشاهدين خصوصاً الأفراد اللي بيعيشوا في العوالم الافتراضية المختلفة، زي:  المدونات، والمنتديات، والمجلات الإلكترونية، والمواقع الإخبارية، ومواقع التواصل الإجتماعي، وأماكن المناقشات.

وأكيد مراقبة وإدارة وحماية سمعة “البراند” الخاص بيك من النقط اللي بتركز عليها، حتى لو “البراند” ده هو انت كشخص، والأهم إنها بتدير وجودك عبر منصات التواصل، وبتخلّي التركيز على صورة الهوية اللي حابب تحطها لنفسك، وبتمنع أي محاولة للتأثير على صورتك وحضورك سلبياً، وبتقرب الناس من شركتك، يعني بتقرب الكيان من قلوب الناس وتبعده عن جموده الرسمي، وتخليه أقرب وحقيقي أكتر لسوقك المستهدف.

عموماً؛ إنتشار  الإنترنت بيضرب صناعة الإعلام التقليدي في مقتل ويوم عن يوم بيفقد جمهوره. وده لأن الناس بيزيد بحثها تدريجياً عن المعلومات الأسرع اللي بيوفرها ليهم عالم الويب، وعشان كده إنشاء قسم علاقات عامة إلكترونية أو التعاون مع وكالة علاقات عامة لازم يكون من المراحل الأولى والأساسية عند أي مؤسسة -سواء مبتدئة أو كيان قائم- وده لإن تحسين محركات البحث والوجود على مواقع التواصل الاجتماعي، أمر محوري عشان تضمن نجاح إستراتيجيتك.

العلاقات العامة الالكترونية مختصة بنقل أخبارك للعالم، وتخلي الناس توصلك بسهولة، فلو عندك أخبار عنك أو عن الشغل هيبقى سهل توصيلها  للإعلام، ولو معتقد إن معندكش أخبار فدي مهمة العلاقات العامة إنها تصنعها. عشان كده نقدر نقول بكل ثقة؛ إن مسؤول العلاقات العامة الإلكترونية متخصص في أنه يحط الريشة على راسك ويخّلي كل عين تشوفها.

وهو ده الـOnline- PR.

يمكنك أيضا قراءة هذه المواضيع!

جمعية العلاقات العامّة في الشرق الأوسط MEPRA تكريم شركة ماتريكس

قامت جمعية العلاقات العامّة في الشرق الأوسط MEPRA بتكريم شركة ماتريكس للعلاقات العامة لحصولها علي الجائزة الذهبية كأفضل شركة

أكمل القراءة …

الدروس المستفادة من حملة انتخابات النادي الاهلي

حملة انتخابات النادي الاهلي واحدة من دروس الPR   اللي لازم نستفاد بيها و عشان كدة تعالو مع بعض نشوف

أكمل القراءة …

مرتضي منصور رجل الPR الاول في مصر

اطلقت بالعربي PR علي مرتضي منصور الشهر ده لقب رجل الPR الاول  لانو قدر يطلع قبل الانتخابات باسبوع في

أكمل القراءة …

أضف تعليق:

بريدك الإلكتروني لن يتم نشره

قائمة الموبايل