اتعلم PR مع الزومبي

In منوعات
اتعلم PR مع الزومبي

عارف الموتى الاحياء أو “الزومبي” أبطال أفلام الرعب، ومصدر كوابيس وهواجس ناس كتير قبل النوم أو حتى في أحلامهم، تخيل إن المخلوقات المرعبة دي هتقدر تفيدك في مجال العلافات العامة !

خلينا نكون ايجابيين ونبص لنص الكباية المليان ونتجاهل حقيقة إن الزومبي كائن غبي، الرعب منه يكمن في غباءه وتلزيقه وحشرجة صوته ورغبته في أكل مخك -او أكلك كلك في بعض الروايات- خصوصًا لو أنت شخص بتحترم مساحتك الشخصية ومبتحبش تقرب أوي – جسديا – من حد، وكمان نتجاهل إن الأسوأ من الزومبي هو الزومبي السريع اللي بيعرف يجري، لاننا لو تجاهلنا كل ده وبصينا بنظرة موضوعية هنلاقينا نقدر نتعلم منه حاجة، خلينا نتعلم من اسوأ مخاوفنا، ونشوف إيه دروس الـPR اللي ممكن ناخدها من الزومبي!

الزومبي مادة خصبة للأفلام والروايات وألعاب الفيديو وهتفضل مادة للابتكار والابداع من الصناع خلال العقود الجايه، وفي أغسطس 2015 الـ  PR Daily نشرت مقال بعنوان 4 حاجات الزومبي يقدروا يعلموها لناس الPR .. وجه فيه النقط الرئيسية دي مع بعض التصرّف ..

1- استعد لغير المتوقع:

وانت بتتعامل مع الزومبي لازم تكون دايمًا جاهز لغير المتوقع، لأنهم هيكونوا دايمًا في انتظارك.. في كل وقت وأي مكان، من غير أي تحذير.

لو فتحت باب، توقع تلاقي وراك جثة حية متعفنة متحركة شغوفة بيأس أنها تقطع لحمك حتة حتة، ولو كنت بتشوف المسلسل الأمريكي “The Walking Dead” هتعرف إن مش بس الزومبي خطر عليك، ده كمان عدوك ممكن يكون ابن كارك اللي من نفس نوعك!

النهارده في عالم العلاقات العامة تقدر تطبق نفس المبدأ، لإنك كـPRـست ممكن تتعرض لسيناريوهات كتير مشابهة، زي: تخفيض العميل للميزانية بشكل مفاجئ، تغييرات اللحظة الأخيرة، سرقة الأفكار، وغيره..

لو شغال في مجال العلاقات العامة فعمرك ما هتعرف مستنيك ايه مع العملاء أو المنافسين، عشان كده لازم دايمًا تكون مفتّح وعلى أرض صلبة ومأمن كل الاتجاهات،لأن الكارثة زي الزومبي مبتديش إنذار قبل ما تُقع.

2- العمل الجماعي سر النجاة:

في أي سيناريو عن الهروب من الزومبي، لازم يكون لكل شخص من فريق الأبطال موهبة أو مهارة خاصة بيه، حتى لو كانت المهارة دي صيد الزومبي -راجع زومبي لاند- أو لو كانت قدرته هي الطلوع بأفكار بره الصندوق، زي إننا نقلد الزومبي ونمشي وسطهم وإحنا بنقول عااا وهم مش هيحسوا بينا -راجع فيلم Shawn of the Dead – في أي سيناريو عن الزومبي كل المهارات والقدرات لازم تتحد عشان تتم النجاة، لأن طبعا طير بجناح مكسور ميعرفش يهرب.

نفس الحكاية في عالم صناعة العلاقات العامة، في الزعيم المفكر، والجرافيك العظيم، والـIT المهم، ومسؤولين الميزانية الاشطر من ست بيت راجلها موظف حكومي، ومتخصصين العلاقات العامة والكتاب المختلفين، عشان الشركة تنجح لازم كل دول يشتغلوا سوا في انسجام، ويحاولوا يدمجوا مهاراتهم المتنوعة والمختلفة عشان يكونوا فعالين ويخلّصوا مهامهم على أكمل وجه.

3- إبعد عن عضة الزومبي:

لما زومبي يعضك، الفايروس هينتشر في كل جسمك، وهيتمكن منك وفي النهاية هتتحول لزومبي.

في عالم العلاقات العامة السمعة الوحشة زي عضة الزومبي لأنها هتنتشر بسرعة في كل مكان وهتتمكن منك ونهايتك هتكون قربت.

بمجرد ما تحس إن في صدى سمعة وحشة بيتردد عنك استخدم قوة الـPR في رده، استخدم استراتيجيات حماية السمعة وإدارة الأزمات عشان تخرّج نفسك من الفخ، سواء أنت فعلا تستحق السمعة الوحشة أو لا، خلي الـPR يحميك.

4- الإيجابية مفتاح النجاة:

القاعدة الذهبية لافلام الزومبي والرعب عموما: الشخصيات اللي بتشتكي كتير وبتخاف بسرعة في النهاية بيستسلموا وبيكونوا من أول الناس اللي بيموتوا.

نقدر نقول إن حكم التنمية البشرية الخاصة بضرورة إنك تتمسك بالإيجابية في الأوقات الصعبة، اتقالت عشان عالم صناعة العلاقات العامة، فمن كام سنة الاقتصاد كان بيعاني وعلى وشك الاحتضار والاقتصاد العالمي والمصري لسه قصاده مسافات وبحار وجبال ولازم يحرر أميرة ماريو المخطوفة عشان يوصل للاستقرار، ومع كل ده الشركات بتعاني والتفاعل مع صناعة العلاقات العامة بتتأثر بالسلب.

لو بتشتغل في مجال العلاقات العامة، فتأكد ان الشغل هيمر بأوقات صعبة وهتعاني ماليًا وهتمر باختبارات تانية في الشغل عشان عالم الاعمال مبيرحمش وبيختبرك عشان يظهر معدنك الحقيقي، بس  متخليش حاجة تأثر عليك، وأوعى تستسلم، استخدم فشل الماضي عشان تتجنبه في المستقبل.

يمكنك أيضا قراءة هذه المواضيع!

ملكة جمال فرنسا والكون تتجول في سيارة بشوارع مصر كُتب عليها عبارة “41 سنة”

قامت شركة بيجو احتفلا بمرور ٤١ سنة علي تواجدها بمصر باستضافة الفرنسية إيريس ميتينير، ملكة جمال فرنسا والكون والتي

أكمل القراءة …

يتم اليوم افتتاح فعاليات المؤتمر الاقتصادى العاشر والمعرض السنوى “الناس والبنوك”

تحت رعاية طارق عامر، محافظ البنك المركزى المصرى، يتم اليوم افتتاح فعاليات المؤتمر الاقتصادى العاشر والمعرض السنوى “الناس والبنوك”

أكمل القراءة …
الشركات و منتخب مصر

استخدام الشركات المختلفة للحظة التاريخية التي قادت مصر لكأس العالم 2018

قامت عديد من الشركات علي مواقع التواصل الاجتماعي بمشاركتهم فرحة المصريين بالفوز و كان اهمها قيام الهضبة عمر دياب

أكمل القراءة …

أضف تعليق:

بريدك الإلكتروني لن يتم نشره

قائمة الموبايل